Gen 21 | NdeIBE | STEP | Kwathi uJehova waba lomusa kuSara njengoba wayetshilo, uJehova wamenzela uSara lokho ayekuthembisile.

Genesis 21

Ukuzalwa kuka-Isaka

1 Kwathi uJehova waba lomusa kuSara njengoba wayetshilo, uJehova wamenzela uSara lokho ayekuthembisile.

2 USara wazithwala wazalela u-Abhrahama ebudaleni bakhe indodana ngesikhathi sonaleso uNkulunkulu ayemthembise sona.

3 U-Abhrahama wayitha ibizo elithi Isaka leyondodana ayizalelwa nguSara. 4 Kwathi indodana yakhe u-Isaka isilezinsuku ezificamibili izelwe, u-Abhrahama wayisoka, njengoba walaywa nguNkulunkulu.

5 U-Abhrahama wayeseleminyaka elikhulu ekuzalweni kwendodana yakhe u-Isaka.

6 USara wathi, “UNkulunkulu usengilethele ukuthi ngihleke, njalo bonke abazakuzwa lokhu bazahleka lami.” 7 Wabuye wengeza wathi, “Kambe ngubani obengatsho ku-Abhrahama ukuthi uSara angondla abantwana? Kodwa sengimzalele indodana ebudaleni bakhe.”

Ukuxotshwa kukaHagari lo-Ishmayeli

8 Wakhula umntwana, wakhutshwa ebeleni, kwathi mhla u-Isaka ekhutshwa ebeleni u-Abhrahama wenza idili elikhulu. 9 Kodwa uSara wabona ukuthi indodana leyo uHagari, umGibhithe, ayeyizalele u-Abhrahama yayihlayaza, 10 wasesithi ku-Abhrahama, “Mxotshe umfazi lo oyisigqili kanye lendodana yakhe, ngoba indodana yesigqilikazi lesi kayisoze yafa yabelana ilifa lendodana yami u-Isaka.”

11 Indaba le yamhlupha kakhulu u-Abhrahama ngoba yayithintana lendodana yakhe. 12 Kodwa uNkulunkulu wathi kuye, “Ungakhathazeki kakhulu ngomfana kanye lesigqilikazi sakho. Lalela konke uSara akutshela khona ngoba isizukulwane sakho sizabalwa ngo-Isaka. 13 Indodana le eyesigqilikazi layo ngizayenza ibe yisizwe ngokuba iyinzalo yakho.”

14 Ngosuku olulandelayo ekuseni kakhulu u-Abhrahama wathatha ukudla lejosaka lamanzi wakunika uHagari. Wakwetshatha emahlombe kaHagari wasebakhupha lomfana. Owesifazana wabamba indlela wayantula enkangala yaseBherisheba.

15 Esephelile amanzi ejosakeni, walahlela umntwana ngaphansi kwesixuku. 16 Yena wasuka wayahlala bucwadlana, okungalingana ukuphosa umtshoko, ngoba wacabanga wathi, “Ngeke ngibukele umfana esifa.” Kwathi ehlezi khonapho bucwala wakhala ebubula.

17 UNkulunkulu wamuzwa umfanyana ekhala, ingilosi kaNkulunkulu yasibiza uHagari isezulwini yathi kuye, “Kwenzenjani, Hagari? Ungesabi; uNkulunkulu usemzwile umfanyana ekhala elele khonaphayana. 18 Mphakamise umfanyana umbambe ngesandla, ngokuba ngizamenza abe yisizwe esikhulu.”

19 UNkulunkulu wasemvula amehlo akhe wabona umthombo wamanzi. Yikho wasesiyagcwalisa ijosaka ngamanzi wapha umfanyana wanatha.

20 UNkulunkulu wayelaye umfana ekhula. Wahlala enkangala waba ngumcibi womtshoko.

21 Wathi ehlala eNkangala yasePharani, unina wamdingela umfazi eGibhithe.

Isivumelwano saseBherisheba

22 Ngalesosikhathi u-Abhimeleki loFikholi, umlawuli wamabutho akhe bathi ku-Abhrahama, “UNkulunkulu ulawe kukho konke okwenzayo. 23 Manje funga kimi khonapha phambi kukaNkulunkulu ukuthi kawusoze wenze izinto zobuqili kimi, loba kubantwabami loba izizukulwane zami. Tshengisa kimi lakulo ilizwe ohlezi kulo njengesizwe wona lowomusa engikwenzele wona.”

24 U-Abhrahama wathi, “Ngiyafunga.”

25 Yikho u-Abhrahama wasesola ku-Abhimeleki ngomthombo othile izinceku zika-Abhimeleki ezaziwuthumbile. 26 Kodwa u-Abhimeleki wathi, “Angikwazi ukuthi ngubani okwenzileyo lokho. Kawuzange ungitshele, sekuyikhona ngikuzwa nje lamhla.”

27 Yikho u-Abhrahama waletha izimvu lezinkomo wazipha u-Abhimeleki, amadoda womabili enza isivumelwano. 28 U-Abrahama wehlukanisa amazinyane amasikazi ayisikhombisa emhlambini, 29 u-Abhimeleki wambuza u-Abhrahama wathi, “Atshoni amazinyane la amasikazi ayisikhombisa owehlukanise emhlambini wawabeka wodwa na?”

30 Waphendula wathi, “Yamukela ezandleni zami amazinyane la ayisikhombisa njengobufakazi bokuthi yimi engemba umthombo lo.”

31 Ngakho indawo leyo yathiwa yiBherisheba ngokuba amadoda la womabili enza isifungo khonapho.

32 Ngemva kokuba isivumelwano sesibotshiwe eBherisheba, o-Abhimeleki loFikholi umlawuli wamabutho akhe babuyela elizweni lamaFilisti.

33 U-Abhrahama wahlanyela isihlahla sethamarisiki eBherisheba, khonapho walibiza ibizo likaJehova, uNkulunkulu Waphakade. 34 UAbhrahama wahlala elizweni lamaFilisti okwesikhathi eside.